Pasto: HP lead articles

کابل (پژواک، ۳۱ غویی ۹۵): د شمالي اتلانیک سازمان ناټو اعلان وکړ، چې تر ۲۰۱۶ کال وروسته به هم د افغان ځواکونو د روزنې ماموریت ته ادامه ورکوي.

دوه کاله مخکې د بریتانیا په ویلز ښار کې د ناټو په سرمشریزه غونډه کې په افغانستان کې د جګړه ییز ماموریت د پای ته رسیدلو او د افغان ځواکونو د روزنې ماموریت د پیلولو اعلان شوی و،  چې د دوو کالو لپاره به وي.

د ناټو سازمان د بهرنیو چارو وزیرانو په دوه ورځنۍ غونډه کې چې پرون د بلجیم په پلازمینه بروکسل کې پیل شوې وه، نن دویمه ورځ یې د افغانستان په اړه ځانګړې شوې وه، چې د بهرنیو چارو وزیر صلاح الدین رباني هم ګډون کړی و.

دغه راز د افغانستان په اړه ځانګړې شوې برخه کې د ناټو د ۲۸ غړو او ۱۲ همکاریو هېوادونو ترڅنګ  د ملګرو ملتونو، اروپایي اتحادیې، جاپان او د سویلي کوریا استازو برخه اخیستې وه.

تر یادې غونډې وروسته یوې خبري غونډې ته د وینا پر مهال د ناټو سرمنشي جینز سټولټنبرګ وویل، چې دوی تر ۲۰۱۶ کال وروسته هم د افغان ځواکونو د روزنې ماموریت ته دادامې ورکولو پریکړه وکړه.

هغه زیاته کړه، چې دوی د افغانستان وروستي سیاسي او امنیتي حالات او له افغانستان سره د ناټو د راتلونکو همکاریو په اړه بحث او ارزونه وکړه.

د ناټو سرمنشي د افغان ځواکونو د کړنو او فعالیتونو ستاینه وکړه او ویې ویل، چې په دې وروستیو کې هغوی له ځانه ځانګړې وړتیاوې ښودلې دي.

سټولټنبرګ وویل، چې په افغان ځواکونو کې هغه څه څرګند شوي او لیدل کیږي، چې د ناټو لخوا ورته روزنه ورکړل وي او هغوي خپل مسوولیتونه په ښه توګه پرمخ وړي.

خو سټولټنبرګ زیاته کړه، چې افغانستان  اوس هم له  ګڼ شمېر او جدي ننګونو سره مخ دي.

د هغه په وینا، په همدې موخه د بهرنیو چارو وزیرانو نن پریکړه وکړه، چې تر ۲۰۱۶ کال وروسته به هم د افغان ځواکونو د روزنې ماموریت ته ادامه ورکوي.

د ناټو سرمنشي وویل، چې په دې غونډه کې دوی د افغان ځواکونو ددوامداره مالي ملاتړ په اړه هم خبرې وکړي اوټولو ګډونوالو په دوامداره توګه د افغان ځواکونو د مالي ملاتړ ژمنې وکړې.

ده زیاته کړه، چې دا مالي ملاتړ به تر ۲۰۲۰ کاله پورې ادامه لری.

سټولټنبرګ هیله څرګنده کړه، چې یوه نیمه میاشت وروسته به د ناټو په سرمشریزه غونډه کې چې د پولینډ په پلازمینه وارسا کې جوړیږي، ولسمشران به د یادو ژمنو ملاتړ وکړي.

KABUL (Pajhwok): The NATO secretary-general has welcomed a draft peace agreement before the administration of President Ashraf Ghani and the Hezb-i-Islami Afghanistan (HIA). Jens Stoltenberg hailed the deal at a news conference in Brussels, where he...

PUL-I-KHUMRI (Pajhwok): Nine civilians, including women and children, have been killed in a roadside bombing in the northe province of Baghlan, an official said on Friday. The explosion took place in Baghlan Markazi district on Thursday evening,...

کابل (پژواک ٣٠ غويى ٩٥): يو مدني بنسټ ادعا کوي، چې جاسوسو مديرانو په بغلان کې د بيوميټريک سيستم د وسلوالو مخالفينو په واک کې ورکړى او که چېرې حکومت دغه کسان ونه نيسي نو دغه ولايت به د وسله والو مخالفينو لاسونو ته وغورځي.

 دغه بنسټ (د اصلاح او بدلون لپاره د ځوانانو شبکه) ادعا کوي چې وسله وال طالبان په دغه ولايت کې له بيوميټريک سيستم څخه په ګټې له بغلان څخه د تېرېدو پر مهال په نښه او له هغه وروسته بيا نيسي.

 بيوميټريک، د يوه شخص د هويت پېژندنې لپاره د هغه د بدن د ټولو ځانګړنو د اندازې لپاره ځانګړې ټيکنالوجي ده.

 د يادې شبکې مرستيال سيد ميثم نن په کابل کې په يوه خبري ناسته کې وويل: "په تېرو څو کلونو کې د بغلان وضعيت د اندېښنې وړ و، خو اوس د دې ډار شته چې بغلان د کندوز سناريو تجربه نه کړي او په دغه ولايت کې د تېرو څوارلسو کلونو ټولو لاسته راوړنې لاهو نه شي."

 د کندوز ولايت مرکز تېر کال د وسله والو مخالفينو له لوري ونيول شو، چې له څو ورځو عملياتو وروسته د دولت لاسونو ته وغورځېد.

 د احساني په وينا، د بغلان ولايت سيمه ييزو چارواکو د مديريتي کمزورتيا له امله، د دولت وسله وال مخالفين د مرکز په دوه کيلومټرۍ کې حضور لري.

 نوموړي د جزياتو له وړاندې کولو پرته وويل، چې ددغه ولايت مهمې سيمې يا د وسله والو مخالفينو په واک کې دي او يا هم د هغوى له لوري کلابنده شوې، ځکه له يوه لوري مرسته کوونکي ځواکونه په خپل وخت نه رارسيږي او له بل لوري په بغلان کې موجود امنيتي ځواکونو ښه نه دي سنبال شوي.

 نوموړي زياته کړه: "د امنيتي ځواکونو په همت به هيڅکله هم وسله وال طالبان حاکم نه شي، خو له حکومت غوړاو، څو جاسوس او خاين مديران وپيژنې او د قانون منګولو ته يې وسپاري."

 نوموړي دغه راز د حکومت له مشرانو غوښتنه وکړه، څو هغه جاسوسان چې د امنيتي ځواکونو په ليکو کې جاسوسي کوي، له پېژندنې وروسته سخته سزا ورکړي. نوموړي په دې اړه هم جزيات ورنکړل.

 احساني د بيومټريک سيستم ته د وسله والو مخالفينو له لاسرسي څخه د اندېښنې ترڅنګ وويل: "هرو مرو هغو جاسوسانو او مديرانو چې په نظام کې کار کوي، دغه سيسټم دوى ته ورکړى دى. ټول مسافر چې له لارې تېرېږي، له موټرونو يې راښکته کوي او بيوميټريک کېږي او هر څوک چې په دغه سيستم کې موجود او دولت کارکوونکي وي، پېژندل کېږي او طالبان يې له ځانونو سره وړي."

 نوموړي له چارواکو وغوښتل څو په دې اړه ژر تر ژره ګام پورته کړي او د دولت وسله وال مخالفين چې د هېواد د شمال او شمال ختيځو ولايتونو اوسېدونکو ته د اندېښنې وړ ګرځېدلي، وځپي.

 د هغه په وينا، اوسمهال هيڅوک هم د بغلان په لويه لار کې ځان خوندي نه ګڼي، ځکه وسله وال مخالفين کاوونکو د بيوميټريک سيستم څخه په ګټې د دولت کارکوونکي نيسي.

 يادو دواړو سرچينو ونه ويل، چې وسله والو طالبانو تر اوسه پورې په دې تړاو څومره کسان نيولي دي.

 اکمل دغه راز وويل، هغو کسانو ته د وسلو وېش چې د ولسي پاڅون کوونکو تر نوم لاندې فعاليت کوي، د ياد ولايت اوسېدونکو ته د اندېښنې وړ ګرځېدلي، ځکه د ولسي پاڅون څخه ښه مديريت نه کېږي او په  ډېرو مواردو کې دا ډول پاڅونونه د لا ډېرې نا امنۍ لامل شوي دي.

 د يادې شبکې په اعلاميه کې چې نن د يادې ناستې پر مهال ولوستل شوه، له حکومت غوښتنه شوې څو د دغه ولايت سيمه ييز چارواکي لکه د ولايت والي عبدالستار بارز، د والي مرستيال عبدالقديم نيازى او د بغلان امنيه قوماندان مل پاسوال محمد عوض نظري د کار بې کفايتۍ له امله له دندو ګوښه کړي او عدلي او قضايي ارګانونو ته وروپېژني.

 دغه راز په اعلاميه کې له حکومت غوښتنه شوې، چې د کابل-مزارشريف لويه لار د وسله والو مخالفينو له وجود پاکه کړي او په دغه ولايت کې د وسله والو ځواکونو د ځپلو لپاره هر ډول ګامونه پورته کړي.

 په اعلاميه کې له طالبانو او نورو وسله والو ډلو غوښتنه شوې، څو د سولې خبرو اترو مېز ته راشي، له هغه پرته به له منځه ولاړې شي.

 خو د بغلان والي عبدالستار بارز د جګړې د مديريت او له وسله والو مخالفينو سره د مبارزې په برخه کې د چارواکو بې کفايتي رد کړه او وايي، چې له تېرو شپږو مياشتو راهيسې چې د والي په توګه ګومارل شوى، په دغه ولايت کې يې وسله والو مخالفينو ته ډېر زيان اړولى دى.

 نوموړى اوسنۍ جګړه د پاکستان د استخباراتو جګړه بولي او وايي، چې په بغلان کې د عملياتو ترسره کولو مسووليت د مرکز د درې ګونو ارګانونو د چارواکو پر غاړه ده او سيمه ييز چارواکي په دې اړه هيڅ واک نه لري.

 بارز د اصلاح او بدلون لپاره د ځوان فعالانو شبکې په اړه وويل: "دغه شبکه په اصل کې په بغلان کې هيڅ فزيکي شتون نه لري او امکان لري چې د يو شمېر سياسي ډلو له لوري د بغلان د سيمه ييزو چارواکو د بدنامولو په موخه په دندو ګومارل شوي وي."

 نوموړي د وسله والو مخالفينو لاسونو ته د بيوميټريک سيسټم د غورځېدو په اړه وويل، چې تر اوسه يې په دې اړه کوم راپور نه دى ترلاسه کړى.

MAIMANA (Pajhwok): A representative of people with disabilities and martyrs was shot dead after being kidnapped by Taliban in the Sherin Tagab district of northweste Faryab province on Thursday, an official said. Syed LuqmanGahryak, the town’s...

کابل (پژواک، ٣٠ غويى ٩٥): د ناټو د بهرنيو چارو وزيرانو دوه ورځنۍ غونډه نن (د غويي ۳۰مه) په بروکسل کې پيل شوه او په دويمه ورځ به  یې پر افغانستان خبرې وشي.

دغه غونډه په پلازمېنه بروکسل کې د ناټو په مقر کې پيل شوې چې په کې د ناټو د ٢٨ غړو په ګډون د شاوخوا ٤٠ هېوادونو د بهرنيو چارو وزيران ګډون کوي.

د دې غونډې په لومړۍ ورځ به د ناټو سازمان اړوند مسايلو، ترکيې، سوريې، اوکراين او نورو موضوعاتو خبرې کېږي.

په بروکسل کې د ناټو يوې سرچينې پژواک اژانس ته وويل چې په دويمه ورځ غونډه کې به د افغانستان په اړه ځانګړې ناسته کېږي.

هغه زياته کړه چې د افغانستان د بهرنيو چارو وزير صلاح الدين رباني به د خپل هېواد د وروستيو سياسي او امنيتي حالاتو په اړه د غونډې ګډونوالو ته معلومات ورکوي.

د ناټو سازمان سرمنشي جينز سټولټنبرګ نن د دوه ورځنۍ غونډې تر پيل مخکې په يوه خبري غونډه کې وويل چې د بهرنيو چارو وزيران به د وارسا سرمشريزې غونډې د اجنډا په اړه وروستۍ پرېکړې وکړي.

ټاکل شوې د ناټو سرمشريزه غونډه د روان زېږديز کال د جولاى په ٨ مه د پولينډ په پلازمېنه وارسا کې جوړه شي.

د ناټو سرمنشي وويل چې د بهرنيو چارو وزيرانو په غونډه کې په افغانستان کې د دغه سازمان د روزنې روان ماموريت ارزول کېـږي.

هغه زياته کړه چې دغه راز په دې غونډه کې به تر ٢٠٢٠ زېږديز کاله پورې د افغان امنيتي ځواکونو د مالي ملاتړ ژمنې تازه کېـږي.

بلخوا د افغانستان د بهرنيو چارو وزارت له خوا په يوه خپره شوې خبرپاڼه کې راغلي چې د بهرنيو چارو وزير صلاح الدين رباني پرون له چين څخه نېغ په نېغه بروکسل ته روان شوى دى.

سرچينې زياته کړې، رباني به د ناټو بهرنيو چارو وزيرانو په ناسته کې چی په بروکسل کې نن پيل شوې، ګډون وکړي.

په خبرپاڼه کې راغلي چې د ناټو  د بهرنيو چارو وزيرانو په غونډه کې به له ۲۰۱۷ کال وروسته د افغانستان ملي امنيتي او دفاعي  ځواکونو د تمويل د دوام لپاره د هلو ځلو پر څرنګوالي او دغه راز د افغانستان اوسني امنيتي سياسي حالات تر بحث لاندې ونيول شي.

سرچينې زياته کړې، د بهرنيو چارو وزير صلاح الدين رباني په دې ناسته کې د افغان حکومت پرمختګونو او برياوو په اړوند، په هغو برخو کې چې د افغانستان نړيوال همکاران او په ځانګړي ډول ناټو يې له دغه هېواده تمه  لري او دغه راز د ناټو راتلونکو همکاريو څخه د افغانستان د هيلو او انتظاراتو په باب خبرې کوي.